Поранешниот јужнокорејски претседател Јун Сук Јол е осуден на дополнителни 30 години затвор откако судот утврди дека наредил испраќање дронови во Северна Кореја со цел да предизвика реакција од Пјонгјанг и да создаде услови за воведување воена состојба во земјата.
Окружниот суд во Сеул во петокот ги прогласи Јун и неколку поранешни високи безбедносни функционери за виновни за велепредавство и злоупотреба на службената положба.
Според обвинителството, операцијата била спроведена во октомври 2024 година, кога дронови од Јужна Кореја наводно навлегле над Пјонгјанг и расфрлале пропаганден материјал. Судот оцени дека целта била да се испровоцира одговор од Северна Кореја и да се создаде чувство на вонредна безбедносна закана.
„Обвинетите под превезот на воена операција се обиделе да предизвикаат реакција од Северна Кореја со цел да создадат состојба на вонредност“, се наведува во судската одлука.
Судот оцени дека Јун носи најголема одговорност за операцијата, бидејќи токму тој ја донел конечната одлука за нејзино спроведување.
Поранешниот министер за одбрана Ким Јонг-хјун исто така доби казна од 30 години затвор, додека поранешниот шеф на военото контраразузнавање Јео Ин-хјун беше осуден на 15 години затвор.
Адвокатите на Јун тврдеа дека дејствијата биле легитимен одговор на провокациите од Северна Кореја, вклучувајќи ги балоните со отпад што Пјонгјанг ги испраќаше преку границата во текот на 2024 година.
Оваа пресуда доаѓа откако Јун веќе беше осуден на доживотен затвор за обидот да воведе воена состојба на 3 декември 2024 година. Тогаш тој тврдеше дека државата е загрозена од „антидржавни сили“ наклонети кон Северна Кореја, но по масовните протести беше принуден да ја повлече одлуката.
Политичката криза што следеше доведе до негово отповикување од функцијата и предвремени избори на кои победи кандидатот на опозициската Демократска партија, Ли Џе-мјунг.