Албанското специјално обвинителство се сомнева дека бизнисменот Артур Шеху користел фалсификувани документи за сопственост при продажбата на земјиштето на кое компанија поврзана со Џаред Кушнер планира изградба на луксузен туристички комплекс вреден повеќе милијарди евра.
Шеху, кој живее во Мајами, е баран во Албанија под сомнение дека перел пари заработени од трговија со дрога, покажуваат документи од истрагата на Специјалната структура за борба против корупцијата и организираниот криминал, позната како СПАК.
Неговиот адвокат Кујтим Чакрани ги отфрли обвинувањата и рече дека Шеху не е ниту трговец со дрога ниту фалсификатор на имотни документи.
Шеху во април го продал крајбрежното земјиште на компанијата „Албанија ленд девелопмент“, сопственост на инвеститорите во проектот, меѓу кои е и компанијата „Сазан риал естејт девелопмент“, поддржана од Кушнер.
Обвинителите навеле дека врз основа на прибраните докази постои разумно сомневање дека имотот бил стекнат со фалсификувани документи.
Во обвинителските документи нема тврдења за незаконско постапување од страна на Кушнер, инвеститорските компании или другите партнери во проектот. Нема ниту индикации дека купувачите знаеле за сомневањата против Шеху во моментот на трансакцијата.
Компанијата „Сазан риал естејт девелопмент“ соопшти дека верува оти купувањето на земјиштето било извршено законски и во согласност со важечките процедури.
Замрзнати околу 110 милиони евра
Според документите на СПАК, земјиштето било продадено за околу 110 милиони евра. Обвинителството наредило средствата да бидат замрзнати на нотарска сметка, со што е спречено парите да му бидат исплатени на Шеху.
СПАК се сомнева дека Шеху и неговите соработници купувале земјиште со незаконски стекнати средства и создавале лажни сопственички листови или вештачки ја зголемувале површината на имотите.
Потоа, според обвинителството, недвижностите биле префрлани или разменувани за да се отежне нивното следење од институциите.
Шеху и неговите соработници се осомничени и за шверц на кокаин од Јужна Америка преку европски пристаништа и за перење на приходите преку инвестиции во недвижности.
Адвокатот на Шеху тврди дека неговото семејство го поседувало земјиштето уште од времето на Отоманската Империја и дека продажбата била целосно законска.
Жителите тврдат дека земјата е нивна
Проектот е планиран во областа Звернец, во близина на Валона, на крајбрежје со диви плажи, шуми и мочуришта во кои живеат морски желки и фламинга.
Жители на селото повеќе од една деценија го оспоруваат правото на Шеху врз земјиштето. Дел од нив покажале имотни листови и даночни документи за кои велат дека докажуваат дека тие се вистинските сопственици.
Нивниот адвокат Костандин Беко изјавил дека спорот сè уште е активен и дека жителите ќе побараат судска мерка за запирање на проектот.
Плановите за изградба предизвикаа масовни протести во Албанија, наречени „Револуција на фламингата“. Противниците предупредуваат дека комплексот може да ја загрози една од последните недопрени природни области на албанското јадранско крајбрежје.
Проектот предвидува хотели, вили, базени и пристаништа за јахти. Кушнер и неговата сопруга Иванка Трамп претходно изјавија дека идејата ја добиле откако го виделе брегот од јахта.
Владата продолжува да го поддржува проектот
Албанската влада силно го поддржува проектот и тврди дека протестите се организирани од политички противници.
Премиерот Еди Рама претходно го нарече проектот „убав“ и рече дека тој ќе продолжи и покрај противењето.
По објавувањето на сомневањата против Шеху, владин портпарол соопшти дека државата нема да интервенира во приватни трансакции, но дека проектот мора да се спроведува во согласност со албанските и европските закони.
Европската комисија претходно ја повика Албанија, како земја-кандидат за членство во Европската Унија, да ги почитува европските правила за заштита на животната средина.
Новата истрага дополнително ја усложнува иднината на проектот, кој веќе се соочува со судски спорови за сопственоста, протести на локалното население и загриженост за влијанието врз природата.