Американското Министерство за финансии воведе санкции против повеќе од 50 лица, компании и бродови поврзани со Мохамад Хосеин Шамхани, за кого американските власти велат дека управува со една од најголемите мрежи за извоз на иранска нафта и заобиколување на меѓународните санкции.
Канцеларијата за контрола на странски средства, позната како ОФАК, соопшти дека мрежата се проширила од транспорт на нафта во глобален контејнерски превоз и трговија со суровини.
Според Вашингтон, мрежата на Шамхани му овозможува на иранскиот режим да продолжи да остварува приходи, додека користи сложен систем од посредници, компании, бродови и финансиски канали за да го сокрие потеклото на товарот и сопственоста на средствата.
„Иранскиот режим опстанува врз измама, а мрежата на Шамхани е еден од неговите најпрофитабилни механизми“, изјави американскиот министер за финансии Скот Бесент.
Тој рече дека санкциите се насочени кон финансиската инфраструктура што, според Вашингтон, му овозможува на Техеран да ги финансира заканите за американската национална безбедност и светскиот поморски сообраќај.
Новите мерки следуваат по обновените ирански напади во Ормускиот Теснец и се дел од поширокиот американски притисок врз нафтениот сектор на Иран.
Со последниот пакет, американското Министерство за финансии тврди дека досега санкционирало повеќе од 200 лица, компании и бродови што работат под покровителство на Шамхани.
Финансиери со странски пасоши и компании во Дубаи
Меѓу санкционираните се иранските државјани Хосеин Горбани Захед и Мохамад Реза Рахбар Мадани, кои, според американските власти, имаат и пасоши од Доминика.
Вашингтон ги опишува како клучни финансиери на мрежата, кои обезбедувале странска валута и пристап до компании регистрирани надвор од Иран.
Захед е посочен како вистински сопственик на компанијата „Голден нест груп“, регистрирана на Британските Девствени Острови и во Дубаи, како и директор на компанијата „БСГ менаџмент“ во Дубаи.
Под санкции е ставен и Али Рахбармадани, иранско-руски државјанин, кого американските власти го опишуваат како еден од најблиските деловни соработници на Шамхани.
Тој бил поврзан со повеќе компании за транспорт и, според Министерството за финансии, практично раководел со значаен дел од поморските активности на мрежата.
Вашингтон го обвинува и дека ги охрабрувал руските партнери да најдат начини за заобиколување на ценовното ограничување за руската нафта по инвазијата врз Украина, со цел да се зголемат профитите.
Европски државјани меѓу санкционираните
На санкциската листа се најдоа и данскиот државјанин Мартин Остин Калунд и Италијанката Алесандра Ронко.
Двајцата биле високи раководители во претходно санкционираната компанија „Хаус оф шипинг инвестмент“, која американските власти ја поврзуваат со надзор и управување на транспортните операции на мрежата.
Калунд бил глобален финансиски директор, а Ронко глобален извршен директор. Тие се наведени и како основачи и раководители на консултантска компанија со седиште во Дубаи.
Санкционирани се и државјани на Индија и Велика Британија кои, според ОФАК, работеле на управување со бродови, координирање испораки на иранска нафта и инспекција на пловила.
Контејнерски транспорт до Иран и Хутите
Значаен дел од мерките е насочен кон „Си лид шипинг“, компанија со седиште во Сингапур, и нејзините подружници во Дубаи, Маршалските Острови и Индија.
Според американските власти, компанијата управувала со контејнерски бродови што превезувале легална и нелегална стока кон и од Иран.
Вашингтон тврди дека дел од товарите биле поврзани и со јеменските Хути, кои САД ги означуваат како странска терористичка организација поддржана од Иран.
Санкционирани се и компаниите „Волта шипинг сервисис“ и „Ви фрејт шипинг“, за кои се наведува дека обезбедувале транспортни и посреднички услуги.
Американските власти оценуваат дека мешањето на легална со санкционирана трговија ѝ овозможувало на мрежата да го прикрива потеклото на приходите.
Бродови под повеќе знамиња
На листата се најдоа компании и бродови регистрирани во Дубаи, Хонгконг, Маршалските Острови, Сент Китс и Невис и други јурисдикции.
Меѓу блокираните пловила се бродови под знамиња на Палау, Антигва и Барбуда, Барбадос, Иран и Сент Китс и Невис.
Министерството за финансии наведе дека дел од бродовите превезувале контејнери, а други руски нафтени деривати.
Мрежата, според Вашингтон, има присуство и во Каспиското Море, каде што бродови пренесувале стока меѓу Иран и Русија.
Четири бродови со непозната сопственост и неидентификувани држави на регистрација биле наведени како пловила што директно работеле за Шамхани.
Замрзнување на имот и ризик за странските банки
Со санкциите се замрзнува целиот имот на засегнатите лица и компании што се наоѓа во САД или е под контрола на американски државјани и компании.
Блокирани се и фирмите што се најмалку 50 проценти во сопственост на санкционирани лица.
Американските прописи забрануваат трансакции со блокираните лица и имот, освен кога ОФАК издал посебна дозвола.
Министерството предупреди дека американски и странски лица можат да се соочат со граѓански или кривични санкции доколку учествуваат во заобиколување на мерките.
Странските банки и компании, исто така, ризикуваат санкции доколку свесно спроведуваат значајни трансакции во корист на лица и компании опфатени со новиот пакет.
Вашингтон соопшти дека крајната цел на санкциите не е казнување само по себе, туку промена на однесувањето на санкционираните лица и прекинување на финансиските канали што го поддржуваат иранскиот режим.