Коосновачот на „Мајкрософт“, Бил Гејтс, предупреди дека развојот на вештачката интелигенција напредува побрзо од способноста на општествата да управуваат со последиците и предложи нови институции, заштита на одредени работни места за луѓето и оданочување на употребата на ВИ и роботите.
Во интервју за „Гиквајр“, 70-годишниот Гејтс вели дека е истовремено фасциниран од можностите на технологијата и сериозно загрижен од брзината со која се развива.
„Многу сум загрижен“, рече Гејтс, предупредувајќи дека некои од границите кои претходно се сметале за далечни ризици веќе се преминуваат.
Неговото предупредување следува по објавувањето на нов есеј во кој тврди дека светот нема соодветен план за економските, општествените и безбедносните последици од ВИ.
Три предлози за ерата на ВИ
Гејтс предлага три главни механизми за управување со промените: создавање нови институции задолжени за транзицијата, определување категории работни места кои би останале резервирани за луѓето и воведување даноци за употребата и купувањето системи со вештачка интелигенција и роботи.
Неговата загриженост особено се однесува на пазарот на труд.
Според Гејтс, ВИ нема да влијае само врз канцелариските и интелектуалните професии. Со развојот на роботиката, автоматизацијата ќе може да навлезе и во физичките работни места.
Тој проценува дека напредните роботи способни да преземат значителен дел од физичката работа би можеле да станат реалност за само неколку години.
„Нема да купувате сами“
Гејтс предвидува и фундаментална промена во начинот на кој луѓето го користат интернетот.
Наместо директно да посетуваат апликации и интернет-продавници, корисниците во иднина би можеле најголемиот дел од активностите да им ги препуштат на персонални ВИ-агенти.
„Ќе дојдеме до точка кога нема сами да купувате работи“, рече Гејтс, додавајќи дека личниот агент ќе може да ги извршува задачите наместо корисникот.
Од аспект на продуктивноста, тој го опиша потенцијалот како огромен.
Гејтс ги користи ChatGPT и Claude за „дебати“
И покрај предупредувањата, Гејтс е интензивен корисник на генеративна ВИ.
Тој вели дека ги користи ChatGPT и Claude при истражување теми како маларијата, исхраната и технологијата, а понекогаш создава своевидна дебата меѓу двата системи и самиот себе.
За љубопитните луѓе, според него, сегашниот момент е извонреден бидејќи за неколку секунди можат да добијат објаснувања за теми за кои претходно биле потребни експерти и часови истражување.
Гејтс рече дека бил особено изненаден од способностите на ChatGPT и Claude Code, нагласувајќи дека не очекувал статистичките модели да достигнат толку високо ниво во разбирањето текст и програмирањето.
„Сите се загрижени“
Еден од позначајните делови од неговото предупредување се однесува на расположението во самата ВИ-индустрија.
Гејтс тврди дека во приватните разговори водечките луѓе во секторот се значително позагрижени отколку што тоа може да се заклучи од нивните јавни настапи.
Според него, компаниите истовремено се наоѓаат под огромен притисок да привлечат капитал, поради што отвореното зборување за негативните последици од ВИ може да се смета за штетно за нивниот бизнис.
Гејтс предупреди и дека прашањето за контрола на напредните ВИ-системи станува актуелно многу порано отколку што очекувал.
Сепак, тој не се откажува од ставот дека технологијата може да донесе огромни придобивки. Неговата главна порака е дека позитивниот исход не е загарантиран и ќе зависи од правилата што владите и општествата ќе ги постават додека технологијата сè уште се развива.