Најмалку девет лица загинаа, а најмалку 23 се повредени во руски балистички ракетен напад врз Киев, соопштија украинските власти.
Според Државната служба за вонредни состојби, седум лица загинале во населбата Дарницки, каде што се повредени и 14 лица, меѓу кои две деца. Во Соломјанскиот реон загинале уште две лица, а осум се повредени, исто така меѓу нив две деца, откако делумно се урнала петкатна станбена зграда.
Градоначалникот на Киев, Виталиј Кличко, изјави дека градот бил погоден со балистички ракети, при што избувнале пожари на повеќе локации и дошло до прекини во снабдувањето со електрична енергија. Во населбата Шевченковски делумно е урната станбена зграда, а спасувачките екипи трагаат по затрупани лица.
Нападот следува само два дена откако руска ракета, според полските власти, падна на територијата на Полска за време на масовен напад врз Украина.
Во исто време, украинскиот претседател Володимир Зеленски продолжува да бара од САД дозвола Украина да произведува ракети-пресретнувачи „Патриот“. По средбата со американскиот претседател Доналд Трамп во Вашингтон, Трамп изјави дека конечна одлука сè уште нема.
„Не сме се согласиле Украина да произведува ракети ‘Патриот’, но разговорите продолжуваат. Мораме да бидеме многу внимателни кога станува збор за споделување на оваа технологија“, рече Трамп.
Зеленски, пак, порача дека противвоздушната одбрана, особено ракетите „Патриот“ за пресретнување балистички ракети, останува највисок приоритет за Украина.
Во меѓувреме, Украина ги интензивира сопствените напади врз руска територија, тврдејќи дека гаѓа логистички центри и објекти што руската армија ги користи за снабдување со воена опрема.