Северна Македонија ќе продолжи со модернизацијата на Армијата, а до крајот на годинава се очекува испорака на првите два нови хеликоптери, додека од следната година се најавува зголемување на платите на армиските припадници, беше соопштено во вторникот на централната свеченост во Охрид по повод 18 Август – Денот на Армијата.
Претседателката и врховен командант Гордана Сиљановска-Давкова рече дека Армијата денес претставува високо организирана воена формација со професионален интегритет и висока интероперабилност со сојузничките сили на НАТО.
„Колку е посигурна нашата сопствена одбранбена поставеност, толку е посуштествен нашиот придонес кон заедничката сигурност“, рече Сиљановска-Давкова.
Таа оцени дека јакнењето на националните одбранбени капацитети е предуслов земјата да ја зацврсти позицијата во НАТО како кредибилен сојузник.
Претседателката посочи и на променетата безбедносна средина, оценувајќи дека одбранбениот систем мора да се приспособува на новите закани, меѓу кои сајбер-нападите и предизвиците поврзани со вештачката интелигенција.
Според податоците изнесени на свеченоста, 183 припадници на Армијата учествуваат во меѓународни мисии и операции.
Мисајловски: Пристигнува ново вооружување
Министерот за одбрана Владо Мисајловски рече дека модернизацијата се спроведува според планираната динамика.
Армијата веќе добила оклопни возила JLTV и Stryker, артилериски системи „Боран“ и најголем дел од системите за противвоздушна одбрана „Мистрал 3“.
До крајот на 2026 година, според најавите на Министерството за одбрана, треба да пристигнат и првите два нови хеликоптери.
Мисајловски најави и ново законско решение за професионалните војници кои наполниле 45 години, како и зголемување на платите од следната година.
Паралелно со набавката на вооружување и опрема, Владата планира инвестиции од над 12 милиони евра во армиската инфраструктура и касарните.
„Борбено подготвени“
Началникот на Генералштабот, генерал-мајор Сашко Лафчиски, рече дека Армијата во изминатата година ја потврдила оперативната зрелост и способноста да одговори на современите безбедносни предизвици.
Како еден од клучните резултати ја издвои вежбата „Блесок 26“ и оценувањето на Лесната пешадиска баталјонска група.
„Стекнувањето на статусот ‘борбено подготвен’ не е само формално признание. Тоа е потврда дека зад тој резултат стојат илјадници часови обука, планирање, подготовки, вежби, одрекувања и професионална посветеност“, рече Лафчиски.
Тој оцени дека Армијата се наоѓа во најинтензивниот процес на модернизација од нејзиното формирање, но додаде дека човечкиот потенцијал останува нејзиниот најважен ресурс.
Македонската Армија беше формирана во 1992 година, по осамостојувањето на државата, а Северна Македонија стана членка на НАТО во 2020 година. Денот на Армијата, 18 Август, е поврзан и со формирањето на баталјонот „Мирче Ацев“ во 1943 година.
На свеченоста во Охрид беа доделени одликувања и признанија на армиски единици, институции и припадници за нивниот придонес во развојот на одбранбените способности.