Министерот за надворешни работи Тимчо Муцунски утре во Софија ќе има билатерална средба со бугарската министерка за надворешни работи Велислава Петрова-Чамова, откако македонската страна добила официјална потврда од Софија.
Средбата доаѓа по иницијативата за обновување на директниот политички дијалог меѓу двете земји, во услови кога евроинтегративниот процес на Северна Македонија останува блокиран поради спорот со Бугарија.
Разговорот треба да се одржи во рамките на регионалниот состанок посветен на Коридорот 8, а точниот формат дополнително ќе го утврди бугарската страна.
Премиерот Христијан Мицкоски изјави дека Владата останува на ставот дека дијалогот и добрососедските односи се единствениот пат кон решение.
Од „средба на коњопој“ до официјален билатерален состанок
Потврдата од Софија доаѓа еден ден откако Мицкоски рече дека, имајќи го предвид однесувањето на бугарската страна, не очекува формална средба и дека разговорот би можел да се сведе на краток неформален контакт.
Со пристигнувањето на дипломатската потврда, средбата сега добива официјален билатерален формат.
Иницијативата следува по посетата на претседателката на Европската комисија Урсула фон дер Лајен на Скопје, по која Мицкоски побара од Муцунски да иницира директна средба со бугарската министерка.
Скопје бара решение со одложено дејство на уставните измени
Македонската влада и натаму го застапува ставот дека евентуалните уставни измени треба да имаат одложено дејство, односно да стапат во сила при завршувањето на пристапните преговори.
Во исто време, во Скопје се очекува натамошна разработка на моделот на постепена интеграција во ЕУ, што би овозможил кандидатите постепено да се вклучуваат во дел од европските политики и единствениот пазар пред полноправното членство.
Според владините оценки, Северна Македонија веќе има исполнето дел од предусловите поврзани со усогласувањето со заедничката надворешна и безбедносна политика на ЕУ, додека други реформски барања дополнително треба да бидат прецизирани.