Новиот секретар за одбрана на САД, Пит Хегсет, одликуван ветеран и поранешен водител на „Фокс њуз“, денеска го започна својот прв работен ден во Пентагон, ветувајќи побрзи реформи и посилна одговорност во Одделот за одбрана.
Генералот Чарлс Браун, претседател на Здружениот генералштаб, го пречека Хегсет пред Пентагон, каде тој изјави дека служењето како секретар за одбрана е „животна привилегија“. Хегсет нагласи дека Одделот за одбрана ќе работи со зголемена ефикасност и без одложувања.
„Законските наредби на претседателот на САД ќе бидат извршени брзо и без оправдување,“ изјави тој пред новинарите. „Ќе ги повикаме луѓето на одговорност.“
Почетни чекори
Хегсет доби потврда од Сенатот во петокот со тесно мнозинство од 51-50 гласа, со одлучувачки глас на потпретседателот Џеј-Ди Венс. Тој положи заклетва во саботата, а во неделата одржа воведен разговор со израелскиот премиер Бенјамин Нетанјаху, што Пентагон го опиша како „прва дипломатска средба“.
Очекувајќи дополнителни извршни наредби од претседателот Доналд Трамп, Хегсет најави неколку клучни промени, вклучително и:
- Развој на американска верзија на израелскиот ракетен одбранбен систем,
- Укинување на иницијативите за различност, правичност и инклузивност во Пентагон,
- Враќање на војниците кои беа отпуштени поради одбивање на вакцината против ковид-19.
Фокус на територијалната одбрана
Хегсет изјави дека приоритет на неговото раководство ќе биде поддршката за безбедноста на јужната граница на САД.
„Се` што е потребно на границата ќе биде обезбедено,“ рече тој, додавајќи дека резервистите, Националната гарда и активните сили ќе бидат ангажирани за зачувување на територијалниот интегритет на земјата.
„Ова е промена. Тоа не е начинот на кој се работеше во минатото,“ нагласи Хегсет.
Запрашан за судбината на Авганистанците кои соработуваа со САД пред повлекувањето во август 2021 година, Хегсет рече дека Одделот за одбрана ќе се погрижи да се спроведе одговорност за настаните во Авганистан.
„Ќе стоиме на страната на нашите сојузници,“ додаде тој.