Екологистката Грета Тунберг и уште 11 активисти, меѓу кои и француски пратеник, ќе бидат депортирани откако нивниот брод со мала количина хуманитарна помош беше пресретнат од израелските сили на пат кон Појасот Газа, соопшти израелското Министерство за надворешни работи.
Бродот „Мадлин“, организиран од коалицијата „Флотила на слободата“, беше опишан од Израел како „јахта за селфи“ што пренесува „помалку од еден камион помош“. Израелските власти соопштија дека пловилото е насочено кон пристаништето Ашдод, каде ќе биде спроведена депортацијата на активистите.
Во видео порака снимена пред интервенцијата, Тунберг изјави дека биле „киндапирани“ од страна на израелската морнарица.
Палестинското Министерство за надворешни работи побара меѓународна заштита за активистите, додека висок претставник на ОН повика на организирање повеќе бродови со помош за Газа.
Израел нагласи дека постојат легални канали за испорака на помош, обвинувајќи ги активистите за политичка провокација. „Има начини да се достави помош до Газа – тие не вклучуваат Инстаграм селфија“, се вели во соопштението.
Правната организација „Адале“ од Израел најави правни постапки за ослободување на активистите, тврдејќи дека бродот не влегол во израелски територијални води и дека пловел кон водите на „Државата Палестина“.
Шведското Министерство за надворешни работи потврди дека е во контакт со израелските власти и дека ќе обезбеди конзуларна помош доколку има потреба.
Според организаторите, пловилото тргнало од Катанја, Италија, на 1 јуни и било пресретнато на 9 јуни северозападно од Синајскиот Полуостров, во близина на египетскиот брег.
Во меѓувреме, од Тунис тргна конвој од околу 1.000 лица, организиран од „Туниската координација за заедничка акција за Палестина“, со цел симболично да го „пробие опсадата“ на Газа. Конвојот се очекува да пристигне во Рафа до крајот на неделата.