Европските разузнавачки агенции веруваат дека Русија е во завршна фаза на подготовка за испорака на дронови на Иран за употреба во конфликтот со Соединетите Држави и Израел, изјави висок европски претставник.
Според истиот извор, кој зборувал под услов на анонимност, Москва веќе споделува разузнавачки информации со Техеран за да му помогне при таргетирање на американските сили во регионот. Потенцијалната испорака на вооружени дронови би претставувала прв директен доказ за смртоносна воена поддршка од почетокот на конфликтот.
Претставникот не наведе детали за обемот на испораките, но ги потврди наводите објавени во „Фајненшл тајмс“, според кои западни разузнавачки извештаи укажуваат дека Русија е блиску до завршување на фазна испорака која вклучува дронови, лекови и храна за Иран.
Според извештајот, руските и иранските претставници започнале тајни разговори за испораките неколку дена по нападите врз Техеран извршени од Израел и САД кон крајот на февруари. Испораките би можеле да бидат завршени до средината на следната недела.
Кремљ ги отфрли тврдењата. Портпаролот изјави дека „има многу лажни информации“, додавајќи дека Русија продолжува дијалог со иранското раководство.
Русија и Иран минатата година потпишаа стратешки договор за партнерство, а Москва веќе испратила повеќе од 13 тони медицинска помош во Иран преку Азербејџан.
Зголемената улога на Русија би можела дополнително да го прошири конфликтот, кој започна со нападите на САД и Израел и веќе предизвика критики, вклучително и од дел од западните сојузници, поради нејасни цели и ризик од поширока дестабилизација.
Техеран возврати со илјадници релативно евтини нападни дронови низ Заливот, погодувајќи цели во повеќе држави, вклучувајќи Кувајт, Катар, Бахреин, Саудиска Арабија, Оман, Ирак и Обединетите Арапски Емирати. Иран тврди дека целите се американски интереси во регионот.
Русија, пак, веќе произведува слични „еднонасочни“ нападни дронови базирани на иранскиот модел „Шахед“, кои се користат во војната во Украина.
Европските министри за надворешни работи на состанок на Г7 во Франција со американскиот државен секретар изразија загриженост дека Москва му помага на Техеран во изборот на цели.
Германскиот министер за надворешни работи изјави дека рускиот претседател се обидува да го искористи конфликтот со Иран за да го одвлече вниманието од војната во Украина.
„Путин цинично се надева дека ескалацијата на Блискиот Исток ќе го одвлече вниманието од неговите злосторства во Украина. Тоа не смее да се дозволи“, рече Вадефул.
Британската министерка за внатрешни работи изрази „длабока загриженост“ за врските меѓу Русија и Иран, посочувајќи на долгогодишната соработка, особено во областа на дроновите.