Советот на Европската унија и Европскиот парламент постигнаа привремен договор за две регулативи поврзани со спроведување на тарифните делови од заедничката ЕУ-САД декларација од август 2025 година.
Со договорот се предвидува укинување на преостанатите царини за американски индустриски производи, како и олеснет пристап за одредени американски земјоделски и морски производи на европскиот пазар.
Втората регулатива се однесува на продолжување на суспензијата на царините за увоз на јастог од САД, вклучително и преработени производи.
Од Европскиот совет соопштија дека договорот треба да обезбеди постабилни и попредвидливи трансатлантски трговски односи, но истовремено да ја зачува можноста ЕУ да ги заштити сопствените економски интереси.
Министерот за енергетика, трговија и индустрија на Кипар, Михаел Дамианос, оцени дека Европската унија останува „доверлив и сигурен партнер во глобалната трговија“.
Договорот предвидува и посебен заштитен механизам што ќе ѝ овозможи на Европската комисија да реагира доколку дојде до значително зголемување на американскиот увоз што би можело да им наштети на европските производители.
Комисијата ќе може делумно или целосно да ја суспендира примената на регулативите доколку Вашингтон не ги исполни обврските од заедничката декларација или преземе мерки што ги загрозуваат економските интереси на ЕУ.
Во текстот е вклучена и клаузула според која регулативите ќе престанат да важат на крајот на 2029 година, доколку не биде донесена нова одлука за нивно продолжување.
Дополнително, Европската комисија ќе врши редовен мониторинг на економските ефекти од либерализацијата на трговијата, а на секои три месеци ќе доставува извештаи за трговските текови меѓу ЕУ и САД.
Според податоците на ЕУ, трговијата со стоки и услуги меѓу Брисел и Вашингтон достигнала околу 1,7 трилиони евра во 2024 година, додека меѓусебните инвестиции надминале 4,7 трилиони евра.
Регулативите треба формално да бидат усвоени од Советот на ЕУ и Европскиот парламент пред да стапат во сила.