Агенти на американската Тајна служба застрелале и убиле вооружено лице кое во саботата вечерта отворило оган во близина на безбедносен пункт кај Белата куќа во Вашингтон.
Според првичните информации од Тајната служба, инцидентот се случил кратко пред 18 часот по локално време, кога мажот се приближил до контролен пункт во близина на комплексот на Белата куќа и почнал да пука кон службениците.
Агентите возвратиле со оган и го погодиле напаѓачот, кој подоцна починал во болница.
Во престрелката бил погоден и случаен минувач, кој се наоѓа во критична состојба. Засега не е јасно дали бил ранет од куршумите на напаѓачот или за време на размената на оган со агентите.
Од Тајната служба соопштија дека ниту еден агент не бил повреден и дека Доналд Трамп во моментот на инцидентот се наоѓал во Белата куќа, но не бил во опасност.
Новинарите кои се наоѓале на тревникот пред Белата куќа изјавиле дека слушнале десетици истрели, по што службите наредиле итно засолнување во прес-салата.
Според очевидци, вооружени агенти со автоматски пушки веднаш го блокирале просторот околу Белата куќа, а комплексот бил затворен околу 40 минути.
Директорот на ФБИ, Каш Пател, изјави дека федералните агенти се вклучени во истрагата и дека јавноста ќе биде дополнително информирана.
Инцидентот се случува помалку од еден месец по вооружениот напад за време на вечерата на дописниците во Белата куќа, кога осомничен вооружен напаѓач се обидел да се пробие низ безбедносен пункт со сачмарка.
Тогашниот осомничен, Кол Томас Ален, се изјасни за невин по обвиненијата за обид за атентат врз Доналд Трамп.