Коалицијата ВЛЕН го поздрави, како што наведува, брзиот одговор на надлежните институции и почетокот на постапките за утврдување одговорност за состојбата со загадената вода во Гостивар.
Во партиското соопштение се наведува дека секој што со дејствување или пропуст придонел за случајот треба да одговара пред правосудните органи.
„Здравјето на илјадници граѓани на Гостивар беше загрозено како последица на негрижа и лошо управување, а тоа не смее да остане без одговорност, како што се случувало многупати во минатото. Очекуваме темелна, независна и сеопфатна истрага што целосно ќе го расветли случајот“, соопшти ВЛЕН.
Коалицијата истовремено го поздрави ангажманот на институциите на централно ниво, наведувајќи дека на погодените граѓани им се обезбедува здравствена грижа и снабдување со вода за пиење до целосно надминување на проблемот.
Во соопштението се оценува дека случајот е последица на, како што велат, долгогодишно лошо управување.
„Уште еднаш се потврдува дека долгогодишното лошо управување има цена што денес ја плаќаат граѓаните – Гостивар без вода за пиење, Зајас без канализација“, наведува ВЛЕН.
Коалицијата упати критики и кон лидерот на ДУИ, Али Ахмети, и лидерот на Алијансата за Албанците, Арбен Таравари, оценувајќи дека е „цинично“ повторно да бараат доверба од граѓаните додека, според ВЛЕН, последиците од нивното управување и понатаму влијаат врз секојдневниот живот и здравјето на населението.