Американскиот Пентагон се соочува со сериозно намалување на залихите од најважните системи за противракетна одбрана, што отвора прашања за долгорочната подготвеност на САД во случај на нови конфликти, објави „Фокс њуз“, повикувајќи се на воени експерти и анализи.
Според проценките на Центарот за стратешки и меѓународни студии (CSIS), бројот на ракети-пресретнувачи за системот Патриот се намалил од околу 2.300 пред почетокот на конфликтот на помалку од 827, додека залихите за системот THAAD паднале од 452 на помалку од 278.
Експертите предупредуваат дека обновувањето на овие резерви може да трае три години или повеќе, бидејќи станува збор за сложени системи кои не се произведуваат во големи серии.
„Повеќе од половина од глобалните залихи на пресретнувачи ‘Патриот’ се потрошени на Блискиот Исток. Слична е состојбата и со THAAD, што значително ја ограничува способноста на САД да ги бранат своите сили во Европа или Индо-Пацификот“, изјави Кели Грико од институтот „Стимсон“.
Пентагон побара 67 милијарди долари дополнително финансирање за фискалната 2026 година, од кои 18,2 милијарди долари се наменети за набавка на нови ракети „Патриот“, THAAD, „Томахавк“ и друга високопрецизна муниција.
Во исто време, американската војска се насочува кон производство на поевтини и помасовно произведувани системи, а според сегашните планови, до 2031 година околу 70 проценти од новонабавената муниција ќе биде од оваа категорија.
Во обид да го забрза производството, Пентагон веќе разговара со нови технолошки компании од Силиконската долина, меѓу кои Shield AI и Anduril, кои развиваат беспилотни летала и системи базирани на вештачка интелигенција.
Американските власти сметаат дека една од целите на Иран е да ги принуди САД постојано да користат скапи ракети-пресретнувачи за одбрана на своите бази, со што постепено ги исцрпува нивните резерви.
Според аналитичарите, токму намалувањето на овие залихи е една од причините поради кои американската администрација разгледува различни сценарија за понатамошното водење на конфликтот на Блискиот Исток.