Oпозицискиот Европски фронт сè уште ги финализира кадровските решенија за претстојните локални избори, но најавува формирање на широка коалиција, која ќе ги вклучи политичките партии, граѓанскиот сектор и независни поединци. Партијата паралелно повторно побара и предвремени парламентарни избори, нарекувајќи ја актуелната влада „нелегитимна“ и „антиалбанска“.
„Во моментов се водат разговори и се прават анализи за проширување на Европскиот фронт. Нашиот став е дека тој ќе се проширува не само со партии, туку со секој граѓанин што верува во еднаквост и се спротивставува на политиките на оваа влада“, изјави координаторот на пратеничката група, Блерим Беџети, на денешна прес-конференција.
Според него, коалицијата ќе опфати интелектуалци, невладини организации и граѓани кои, како што рече, се револтирани од „арогантниот пристап“ на Владата и „секојдневната деградација на правата на Албанците и другите заедници“.
Кандидатите сè уште се разгледуваат
На прашањето дали веќе се избрани кандидати за градоначалници, Беџети рече дека процесот е во тек и дека се очекува селекција на „достоинствени и кредибилни личности“.
„Ќе има можност секој што има капацитет и желба да се приклучи на оваа идеја. Имаме многу квалитетни кандидати, но конечниот избор ќе го направиме внимателно, со мнозинска поддршка“, рече тој, додавајќи дека „надежта останува“ и за одржување предвремени парламентарни избори.
На дополнително прашање дали Арбен Таравари ќе биде дел од коалицијата, Беџети не даде конкретен одговор, но најави дека јавноста ќе биде информирана за финалниот состав на фронтот.
Остри критики за јазичната политика и вработувањата
Беџети обвини дека во изминатата година институциите масовно го игнорираат Законот за употреба на јазиците. Според него, над 78 институции одбиваат да го користат албанскиот јазик, а вработените во Инспекторатот за јазиците не добиваат плата со месеци.
„Законот за правична застапеност е блокиран, а балансерот е укинат. Новиот предлог-закон, кој треба да се разгледува утре, не е за застапеност, туку за понижување на Албанците и другите етнички заедници“, изјави тој.
Тој тврди дека вработувањата и унапредувањата се резервирани исклучиво за кадри на ВМРО-ДПМНЕ и нејзините коалициски партнери од македонскиот блок.
Повик за избори и предупредување за одговорност
„Ќе има еден широк фронт на овие локални избори. Ние упорно бараме и предвремени парламентарни избори – граѓаните имаат право да се изјаснат за легитимноста на оваа власт. Изборите се најдемократскиот чин. Никој не треба да бега од нив“, рече Беџети, повикувајќи ги ВЛЕН и ВМРО-ДПМНЕ да прифатат соочување на гласање.
Во случај на пораз на локалните избори, Беџети не најави евентуални промени во раководството, нагласувајќи дека имаат доверба во својата база: „Ние живееме со Албанците и другите заедници и точно знаеме што мислат.“
Според него, владејачката партија поднела 18 предлози за укинување на закони што ја гарантираат еднаквоста, додека оправдувањето со „лажна меритократија“ само дополнително ги дискриминира Албанците.