Потпретседателот на македонското Собрание Антонијо Милошоски во четвртокот изјави дека ако единствената пречка за евроинтеграцијата на Северна Македонија е вклучувањето на Бугарите во Уставот, тогаш треба да се поднесе заедничка резолуција со Бугарија во Европскиот парламент, со која би се потврдиле македонскиот јазик и идентитет.
Предлогот претходно го изнесе и премиерот Христијан Мицкоски во интервју за ТВ Канал 5 во средата вечер.
„Уште веднаш можеме да поднесеме заедничка резолуција, да ја зацврстиме соработката и да го надминеме застојот за отпочнување на преговорите“, рече Милошоски на прес-конференција.
Тој додаде дека понудата е испратена и до бугарскиот претседател Румен Радев и до бугарската влада. Сепак, изрази скепса дали официјална Софија ќе ја прифати иницијативата, поради, како што рече, „задни намери“ за нови барања и идни блокади.
„Голем дел од бугарските претставници работат на негирање на македонскиот идентитет и јазик, слично како што Русија ја негира посебноста на украинскиот народ“, изјави Милошоски.
Тој го обвини и опозицискиот СДСМ за, како што рече, „сервилност“ кон барањата на Бугарија, наведувајќи го Венко Филипче како пример.
Мицкоски, од своја страна, во интервјуто рече дека предложената резолуција во Европарламентот треба „јасно и недвосмислено“ да ја потврди македонската национална и јазична посебност, и оти тоа би било суштински чекор за затворање на долгогодишните билатерални спорови.
„Проблемот не е само Уставот. Сакав да ја претставам вистинската слика – дека Европа мора да го признае македонскиот идентитет како дел од решението“, рече Мицкоски, пренесе ТВ Канал 5.
Во меѓувреме, бугарскиот портал „Лупа“ објави дека Мицкоски во 2008 година побарал бугарско државјанство, повикувајќи се на изјава од поранешниот бугарски генерален конзул во Скопје. Медиумот наведува и дека дел од неговите роднини имаат компании во Бугарија, како и дека снаата на Мицкоски поседува бугарски пасош.
Бугарскиот министер за внатрешни работи, Даниел Митов, неодамна изјави дека од 2007 до јуни 2025 година, Бугарија издала 216.594 пасоши на граѓани од Северна Македонија кои поседуваат и бугарско државјанство.