Општина Тетово во средата ги отфрли наводите дека продала јавен паркинг за 190.000 евра, оценувајќи ги тврдењата како „намерни шпекулации“ и „невистини претставени како вести“.
Во соопштение до медиумите, Општината наведе дека најголемиот дел од парцелата во прашање е во сопственост на приватен оператор од 2019 година, со уреден имотен лист евидентиран во државните институции. „Не станува збор за таен договор, туку за законска сопственост која претходи на секоја шпекулација,“ соопшти локалната власт.
Според Општината, последователната урбанистичка процедура вклучувала спојување на неколку парцели со цел да се регулира урбаниот хаос. За делот кој ѝ е доделен на приватната компанија, е утврдена финансиска обврска од над 800.000 евра – сума што произлегува од официјален акт, а не „услуга“ кон операторот.
Локалната власт тврди дека обврските на инвеститорот вклучуваат изградба на 126 јавни паркинг места, наменети за потребите на градот. Покрај тоа, приватната компанија донирала 200.000 евра за изработка на Генералниот урбанистички план и 100.000 евра за реконструкција на патот Селце–Вејце, инвестиции кои, според Општината, биле одобрени со одлука на Советот на Општината и евидентирани на транспарентен начин.
„Станува збор за вкупен износ од над еден милион евра уплатени и донирани од операторот – средства што одат во корист на јавниот интерес, не на приватен џеб,“ се наведува во демантот.
Општината нагласува дека не продала ниту има намера да продаде јавна сопственост и дека сите постапки биле водени со целосна транспарентност. Во изминатиот период, според соопштението, се вратени три парцели во јавна сопственост – кај Судот, кај гробиштата и во урбаниот блок 13 – каде се уредуваат нови паркинг површини.
„Ние не ја продаваме јавната сопственост – ја враќаме. За разлика од поранешните власти, кои ја приватизираа,“ изјавија од Општина Тетово.
Во соопштението се додава дека „оние што со години ја злоупотребуваа јавната сопственост, денес обвинуваат за сомнителни донации, но граѓаните веќе не се водат по дигитална бучава – туку по факти и резултати“.