Административните мерки на српската влада за ограничување на трговските маржи и намалување на каматите ќе имаат само краткорочен ефект, оценија денеска економисти.
Владата претходно најави дека маржите ќе бидат ограничени на 20 отсто, каматите на потрошувачки, готовински и станбени кредити ќе се намалат, а извршителите нема да можат да одземат единствен стан купен со кредит.
Зоран Пралица, претседател на Унијата на пекари на Србија, изјави дека трговците веќе бараат начини да ја заобиколат новата мерка. Тој наведе дека досега маржите на одредени пекарски производи достигнувале и до 144 проценти.
„Години наназад предупредуваме дека маржите се огромни. Леб кој чини 80 динари, во продавници се продаваше и по 200 динари,“ рече Пралица.
Поранешниот претседател на Здружението на банки на Србија, Владимир Васиќ, оцени дека мерките можат привремено да ги намалат каматите, но дека вистинското решение се долгорочни системски потези за развој на пазарот на капитал и зголемување на конкуренцијата.
„Седум до осум банки држат 92 проценти од пазарот. Без поголема конкуренција каматите ќе останат високи,“ изјави Васиќ, додавајќи дека Србија има поврат на инвестиции повисок од повеќето соседни земји.
Банкарот Љубиша Јовановиќ рече дека мерките се „привремено и популарно решение“ кое нема да биде одржливо на долг рок. „Не се плашам за банките, тие веќе имаат стабилни приходи од провизии и такси,“ додаде тој.
Енергетскиот експерт Жељко Марковиќ ја оцени мерката за попуст на електрична енергија за најсиромашните домаќинства како социјална поддршка која државата мора да ја надомести преку буџетот.
Претседателот Александар Вучиќ најави дека прагот за остварување право на попуст ќе биде 25.000 динари за пензионерите, но дека според државната компанија ЕПС тоа ќе донесе загуби.