Мухарем Салиху, активист на албанската заедница и бизнисмен со потекло од Балканот, е кандидат на регионалните избори во Италија закажани за 23 ноември, објави Балканвју.
Салиху, кој живее и работи повеќе децении во Венеција, ќе се натпреварува во клучните провинции Венеција и Тревизо, каде што активно ја поддржувал албанската заедница и промовирал локален развој. Тој добива поддршка од локалните албански мрежи и поддржувачи и има за цел да влијае врз регионалното донесување одлуки и да ги застапува потребите на Албанците и другите жители кои живеат и работат во регионот.
Како албански претприемач кој поминал 32 години градејќи кариера во Италија, Салиху се кандидира за место во Регионалниот совет на Венето со платформа фокусирана на домување, економски развој и интеграција на мигрантите.
„Успехот на поединецот повеќе не е доволен без политичко претставување“, рече Салиху за Балканвју, додавајќи дека Албанците и другите заедници создале работни места и стекнале углед, но нивните гласови сè уште не се слушаат таму каде што се носат одлуките. „Затоа одлучив да се кандидираам — за да застапувам со чесност, интегритет и одговорност и да ги промовирам вредностите кои нè обединуваат: достоинство, работа, семејство и солидарност.“
Мост меѓу заедниците
Салиху, кој преку своите бизниси вработил и интегрирал илјадници Албанци, се опишува како мост меѓу заедниците. „Работев тесно со италијанските институции, локалните бизниси и пошироката заедница. Вистинската интеграција се гради врз основа на почит и споделена одговорност“, рече тој. Ако биде избран, приоритет ќе му биде да го застапува „заедничкиот интерес на сите граѓани, без разлика на потеклото.“
Програмата на Салиху главно се фокусира на домување, со потенцирање на повеќе од 10.000 семејства кои чекаат сместување, додека околу 7.800 единици во регионот се напуштени. Неговите предлози вклучуваат враќање на празните домови на пазарот на изнајмување по достапни цени, приоритет на урбана регенерација над новоградби и создавање Регионален фонд за гаранции за млади, работници и семејства кои бараат достоинствено домување.
Покрај домувањето, тој предлага поддршка за стартапи, стимуланси за компании кои вработуваат млади и жени, помош за мали бизниси и занаетчии, како и засилено следење на условите за работа во земјоделството и градежништвото. Дополнително, неговите приоритети опфаќаат поддршка за грижа за деца на работни мајки, стипендии за деца, подобрување на јавниот транспорт и поедноставени дигитални јавни услуги, како и почисти и посигурни градови со проширени зелени површини.
Салиху нагласува дека политичкото претставување на мигрантите треба да се гледа како заедничка корист: „Албанците создадоа успешни приказни преку работа и посветеност. Сега економскиот успех треба да се претвори во политичко претставување.“
Искуство во децентрализиран регион
Салиху тврди дека Венето има потреба од „силно претприемачко искуство, познавање на динамиката на миграцијата и способност за обединување на различни заедници.“ Тој додава дека тензиите можат да се намалат преку комуникација и заеднички иницијативи, посочувајќи дека мигрантите придонесуваат со над 10 милијарди евра годишно во италијанската економија, а Албанците отворија над 23.000 бизниси во градежништвото.
За неизвесните гласачи, неговата порака е директна: „Не дозволувајте другите да одлучуваат наместо вас. Ако не гласате, другите ќе одлучуваат за вашиот живот. Време е да се работи за домување, работа, семејство и благосостојба – и сè започнува со еден глас.“