Италијанската премиерка Џорџа Мелони изјави во среда дека последните измени во системот за миграција на ЕУ ќе овозможат имплементација на планот на Рим за управување со мигранти во центри надвор од територијата на Италија, вклучително и во Албанија.
Министрите за внатрешни работи на ЕУ оваа недела го поддржаа пакетот измени кој го надградува Пактот за миграција и азил од 2024 година и предвидува проширени мерки за депортација, како и правна основа за формирање „центри за враќање“ за одбиени азиланти надвор од Унијата, под услов да се исполнат безбедносните стандарди.
„Италија работеше на иновативни решенија кои сега се гледаат со сè поголем интерес и стануваат вообичаена практика“, рече Мелони на Меѓународната конференција на Глобалната алијанса против криумчарењето мигранти. „Станува збор главно за Протоколот со Албанија. Управувањето со барањата за азил и со враќањата надвор од ЕУ, но под европска јурисдикција, станува дел од европската насока.“
Измените, според италијанските медиуми, треба да им овозможат на властите да го надминат правниот застој кој го одложи целосното ставaње во функција на центарот во Гјадër, отворен во 2024 година.
Паралелно, „La Repubblica“ објави дека владата планира до пролет да го активира центарот, со нов систем во кој мигрантите прво ќе поминуваат брза проверка во италијански приемни пунктови пред евентуално да бидат префрлени во Албанија. По усвојувањето на листата „безбедни земји“, во Гјадër би можеле да се испраќаат и мигранти од Бангладеш и Египет.
Планот предвидува барањата за азил да се решаваат во рок од еден месец, а во случај на одбивање – да следи итно враќање. Поднесувањето жалба повеќе нема автоматски да го стопира процесот на депортација, освен ако судот експлицитно не одлучи спротивно.
Италијанската влада сака мерките да бидат изгласани во парламентот пред новиот Пакт за миграција на ЕУ да стапи во сила во јуни 2026 година.