Министерот за транспорт, Александар Николоски, предупреди дека цените на становите во моментот се напумпани и им препорача на граѓаните да не купуваат станови што сè уште не се изградени.
„Се загрижувам дека се создава пазарна ‘балон’ во градежната индустрија. Сакам да упатам апел до граѓаните да не купуваат станови пред да ги видат лично и да се осигураат дека објектот веќе има издадена употребна дозвола“, рече Николоски во подкастот на Радио Лидер.
Тој посочи дека купувањето станови само врз основа на белешка во Катастарот или други формалности е ризично, бидејќи пазарот може да се урне и многу објекти да останат недовршени. „Советот е едноставен: побарајте од инвеститорот употребна дозвола и уверете се дека е регистрирана во Катастарот“, додаде министерот.
Николоски истакна дека досега не сретнал никого кој купил стан по цена од 2.500 до 3.000 евра за метар квадратен, што според него е доказ за формирање на ‘балон’ на пазарот.
Министерот додаде дека државата не може ефективно да интервенира за да го спречи пукањето на балонот, бидејќи станува збор за ограничени простори и голем притисок на одредени урбани зони, додека цените во други населби се во опаѓање.