Собранието на Албанија во вторникот усвои резолуција со која Исламската Република Иран се прогласува за спонзор на тероризам. Резолуцијата беше усвоена со 79 гласа „за“, еден воздржан и без гласови „против“. Пратениците од опозицијата не присуствуваа на седницата, откако претходно најавија бојкот.
Опозицијата тврдеше дека седницата била свикана без одобрен дневен ред, оценувајќи ја како „лична агенда на премиерот Еди Рама“.
Во резолуцијата се наведува дека иранските власти се вмешани во финансирање, обука, вооружување и насочување на недржавни вооружени групи кои се означени како терористички организации во повеќе региони.
Документот исто така наведува дека Иран, преку своите државни институции, вклучително и Исламската револуционерна гарда (IRGC), поддржувал и координирал активности што дестабилизираат земји на Блискиот Исток и пошироко.
Албанија се повикува и на сопственото искуство, потсетувајќи на сериозниот сајбер напад врз државните институции во 2022 година, кој Тирана го припиша на структури поврзани со Иран, како и на неодамнешни обиди за напади врз системите на парламентот.
Резолуцијата ги осудува актите на насилство и агресија, вклучително и сајбер нападите врз државни институции и критична инфраструктура, како прекршување на меѓународното право и потенцијални форми на тероризам.
Се изразува загриженост за употребата на прокси вооружени групи и хибридни методи за ширење страв и дестабилизација, оценувајќи дека тие се неспоиви со мирните меѓународни односи.
Како членка на НАТО и кандидат за членство во Европската унија, Албанија повторно потврди дека нејзината надворешна и безбедносна политика се темели на демократска солидарност, владеење на правото и заштита на меѓународниот мир и стабилност.
Собранието формално го прогласи Иран за држава спонзор на тероризам и за држава која користи терористички средства за остварување на своите надворешнополитички цели.
Во резолуцијата се осудуваат и активностите на Исламската револуционерна гарда и поврзаните структури, а владата се повикува да ги зајакне националните и меѓународните мерки против државно спонзориран тероризам и сајбер закани.
Пратениците повикаа на поблиска соработка со сојузничките земји за спречување на финансирањето на тероризмот и активностите поврзани со иранските државни структури, како и на поддршка на меѓународни иницијативи за одговорност за тероризам, сајбер напади и прекршувања на меѓународното право.
Исто така се бара владата да ја прогласи Исламската револуционерна гарда за терористичка организација и да го класифицира Хезболах како иранска прокси терористичка организација, следејќи го примерот на САД, Германија, Холандија и повеќе земји членки на ЕУ.
Резолуцијата ги повикува демократските земји и меѓународните организации да разгледаат координирани мерки против државно спонзориран тероризам и да ја зајакнат меѓународната соработка во справувањето со овие закани.
Албанија ја потврди својата посветеност на меѓународниот мир, демократските вредности и заштитата на цивилите од терористички акти, наведувајќи дека резолуцијата ќе биде доставена до сојузничките влади, Обединетите нации, Европската унија и други релевантни меѓународни партнери.