Пратениците во Собранието со 70 гласа „за“ и 11 „против“ ги усвоија измените на Законот за Владата, со кои се укинува техничката влада по одржувањето на следните парламентарни избори.
Измените, предложени од владејачкото мнозинство, предвидуваат напуштање на моделот на т.н. „пржинска влада“, кој досега се применуваше 100 дена пред избори со вклучување на опозицијата во извршната власт.
Од опозициската СДСМ остро реагираа, оценувајќи дека со укинувањето на техничката влада се отвора простор за нерегуларности во изборниот процес.
„По укинувањето на техничката влада, власта ќе спроведе изборна кражба“, соопштија од партијата, обвинувајќи дека се уриваат механизмите за контрола и баланс во изборниот период.
За време на дебатата, од ДУИ сметаа дека предлогот треба да се разгледа во Комитетот за односи меѓу заедниците, оценувајќи дека измените можат да влијаат врз политичкото и институционалното претставување на заедниците.
„Овој предлог-закон директно ги засега односите меѓу заедниците и затоа мора да се разгледа во надлежните тела“, изјави координаторката на пратеничката група на партијата, Рина Хајдари.
Сличен став имаше и Алијансата за Албанците, од каде велат дека нема да поддржат укинување на техничката влада без широка дебата и политички договор.
„Не треба да се носат одлуки на насилен начин, особено кога станува збор за прашања што влијаат врз претставеноста на граѓаните“, изјави пратеничката Илире Даути.
Од СДСМ, исто така, беа против измените, оценувајќи дека техничката влада е важен механизам за обезбедување фер избори.
„Техничката влада е мост кон демократски процеси и гаранција за еднакви услови“, изјави Јованка Тренчевска.
Владините претставници, пак, ја бранат реформата како неопходен чекор, тврдејќи дека државата има капацитет самостојно да организира избори без овој модел.
„Укинувањето ќе важи по следните избори и не прејудицира кој ќе биде власт или опозиција“, изјави Аднан Азизи, додавајќи дека истата иницијатива била поддржана и претходно од политички актери.
Министерот за администрација Горан Минчев посочи дека биле одржани повеќе координации со пратеничките групи и дека измените се дел од поширока реформска агенда.
Со новите измени, овој модел формално ќе престане да важи по следните парламентарни избори, што отвора нова фаза во политичките односи и изборните правила во земјата.