Две успешни трансплантации – на црн дроб и бубрег – се извршени во земјава, откако едно семејство донело одлука за донација на органи во момент на лична загуба, соопшти Министерството за здравство.
Црн дроб е трансплантиран кај 67-годишен пациент, со што му е спасен животот, додека 51-годишна пациентка добила нова шанса за поквалитетен живот по трансплантација на бубрег. Двајцата пациенти се во стабилна состојба и се пуштени на домашно лекување.
Министерот за здравство Азир Алиу изјави дека станува збор за пример на исклучителна хуманост и солидарност.
„Нема поголем чин од тоа во момент на болка да подарите живот. Одлуката на ова семејство ќе продолжи да живее преку оние на кои им е дадена нова шанса,“ рече Алиу.
Националната координаторка за трансплантација, проф. д-р Билјана Кузмановска, истакна дека без согласноста на семејството ваквите интервенции не би биле можни.
„Секоја трансплантација носи човечка приказна. Ова е приказна за храброст и дарување живот – највисок облик на солидарност,“ рече таа.
Од Министерството изразија благодарност и до медицинските тимови од повеќе клиники и институции кои учествувале во постапките, нагласувајќи дека трансплантациите се резултат на координирана и посветена работа на здравствениот систем.