Организирана криминална група инволвирана во извршување на повеќе кривични дела е сузбиена во денешна акција на Одделот за сузбивање организиран и сериозен криминал при Министерството за внатрешни работи, во координација со Основното јавно обвинителство за гонење организиран криминал и корупција.
Од Министерството за внатрешни работи соопштија дека, по претходна судска наредба, се вршат претреси на повеќе локации во Скопје, Струмица и Битола.
Во рамки на акцијата се уапсени повеќе лица.
Според првичните информации, дел од уапсените се вработени како доктори на скопските клиники, а дел се сопственици на дерматолошки ординации.
Сомневањата се дека групата била поврзана со нелегален увоз и дистрибуција на фалсификувани ботокси, филери и други медицински препарати, кои биле внесувани во Македонија преку нелегални канали од повеќе држави, меѓу кои Кина, Турција и Србија. Производите, според информациите, немале соодветна контрола, дозволи ниту регистрација, а потоа биле пласирани на пазарот.
Овие препарати, кои често се користеле под превезот на естетски третмани, наместо подобрување на изгледот, можеле да предизвикаат сериозни здравствени последици – инфекции, деформитети, трајни оштетувања, па дури и ризик по животот на граѓаните.
Надлежните сè уште не соопштуваат детали за акцијата и за уапсените. Повеќе информации се очекуваат во текот на утрешниот ден.