САД извршија нови воздушни напади врз јужен Иран, насочени кон ракетни позиции и чамци за кои Вашингтон тврди дека се обидувале да постават мини во Ормутскиот теснец.
Американската Централна команда соопшти дека нападите биле преземени во „самоодбрана“ со цел заштита на американските сили од закани од иранските сили.
Портпаролот на Централната команда, капетан Тим Хокинс, изјави дека американската војска „продолжува да ги брани своите сили, користејќи воздржаност за време на тековниот прекин на огнот“.
Иран засега официјално не одговори на нападите. Портпаролот на иранското Министерство за надворешни работи, Есмаил Багаи, претходно изјави дека има напредок во разговорите за крај на конфликтот, но оти договор „не е непосреден“.
Не е јасно какво влијание ќе имаат нападите врз можниот мировен договор меѓу САД и Иран.
Американскиот државен секретар Марко Рубио изјави дека договор сè уште е можен. Тој посочи на разговорите меѓу главниот ирански преговарач, шефот на дипломатијата на Иран и катарскиот премиер.
„Ќе видиме дали можеме да постигнеме напредок. Има многу разговори околу конкретниот јазик во почетниот документ“, изјави Рубио за време на посетата на Индија.
Тој додаде дека американскиот претседател Доналд Трамп сака договор, но „или ќе биде добар договор, или нема да има договор“.
Рубио повтори дека Ормутскиот теснец мора да остане отворен.
„Теснецот мора да биде отворен. Ќе биде отворен вака или онака“, рече Рубио.
Според американските власти, нападите биле насочени кон област во близина на Бандар Абас, пристанишен град во јужен Иран и седиште на иранска поморска база лоцирана покрај Ормутскиот теснец.
Иранските државни медиуми претходно јавија дека локалните власти истражуваат експлозии слушнати во Бандар Абас.
Во мај имаше судир меѓу американски и ирански воени бродови во Ормутскиот теснец, за што двете страни меѓусебно се обвинија.
Трамп во текот на викендот изјави дека страните се блиску до договор. Подоцна рече дека им наредил на американските преговарачи „да не брзаат“.
Багаи изјави дека голем дел од прашањата се усогласени, но оти никој не може да тврди дека договорот е непосреден.
Според американски медиуми, меморандумот што се разгледува предвидува продолжување на прекинот на огнот за 60 дена, повторно отворање на Ормутскиот теснец и нови разговори за иранската нуклеарна програма.
Американските разузнавачки служби веруваат дека врховниот лидер на Иран, Моџтаба Хамнеи, се наоѓа на тајна локација по нападот во кој загинал неговиот татко и претходник.
Според американски медиуми, меѓу најспорните прашања остануваат укинувањето на санкциите, одмрзнувањето на иранските средства и барањата на САД Иран да ги ограничи своите нуклеарни амбиции.
На почетокот на војната Иран, според проценките, поседувал околу 440 килограми ураниум збогатен до 60 проценти чистота, ниво блиску до она потребно за производство нуклеарно оружје.
Трамп во понеделникот изјави дека збогатениот ураниум или веднаш ќе биде предаден на САД или ќе биде уништен во координација со Исламската Република Иран.
САД и Иран формално почитуваат прекин на огнот од 8 април. Иран продолжува со контрола врз пловидбата низ Ормутскиот теснец. Американската морнарица ги блокира иранските пристаништа.
Конфликтот започна на 28 февруари, кога САД и Израел извршија големи напади врз Иран. Техеран возврати со напади врз Израел и американски сојузници во Заливот, по што практично го затвори Ормутскиот теснец. Потегот предизвика нагол раст на цените на нафтата на светските пазари.