Американската влада објави нов пакет документи поврзани со НЛО и необјаснети воздушни феномени, кои содржат воени извештаи, сведоштва од пилоти, анализи на радарски податоци и интерни проценки на безбедносните служби.
Според „Тајм“, документите се дел од поширок процес на декласификација што последните години го спроведуваат американските институции под зголемен притисок од јавноста и Конгресот.
Во материјалите има извештаи за необични летала што се движеле со брзини и маневри кои, според сведоштвата, не можат лесно да се објаснат со позната технологија.
Дел од документите се однесуваат на инциденти забележани од воени пилоти и екипажи на американската морнарица, кои пријавиле објекти што нагло менувале правец, исчезнувале од радар или лебделе без видлив погон.
Американските власти и понатаму немаат докази дека станува збор за вонземски технологии, но признаваат дека одреден број случаи остануваат необјаснети.
Во последните години Пентагон формираше и специјални канцеларии за анализа на таканаречените UAP – „неидентификувани аномални феномени“, со цел да се процени дали тие претставуваат безбедносен ризик.
Објавувањето на новите досиеја повторно отвори дебата во американската јавност околу транспарентноста на институциите и можноста одредени информации со децении да биле чувани во тајност.
Интересот за НЛО-темите значително се зголеми откако американската војска официјално потврди автентичност на неколку видеоснимки од средби на пилоти со необјаснети летечки објекти.