Германскиот канцелар Фридрих Мерц изрази уверување дека кохезијата на НАТО останува силна, и покрај најавеното повлекување на американски трупи од Германија и зголемените тензии меѓу Берлин и Вашингтон околу конфликтот во Заливот.
„Силата на НАТО не зависи само од бројот на војници, туку од заедничките цели, а тоа единство останува недопрено“, изјави Мерц за време на посетата на Стокхолм, каде присуствуваше на конференција на шведските конзервативци предводени од премиерот Улф Кристерсон.
Мерц додаде дека нема сомнеж оти САД имаат интерес да имаат „силна европска компонента на НАТО покрај себе, и обратно“.
Американското Министерство за одбрана претходно соопшти дека ќе повлече околу 5.000 од вкупно 39.000 американски војници стационирани во Германија.
Најавата доаѓа во период на растечки несогласувања меѓу американскиот претседател Доналд Трамп и Мерц во врска со конфликтот со Иран.
Минатата недела Мерц, обраќајќи им се на германски ученици, изјави дека иранските власти намерно дозволиле американските пратеници да отпатуваат во Пакистан и да се вратат „без никаков резултат“.
„Цела нација е понижена од иранското раководство“, рече Мерц.
Трамп возврати со остри критики, нарекувајќи го Мерц „целосно неефикасен“ лидер на „распадната држава“, кој „мисли дека е во ред Иран да има нуклеарно оружје“.
Во меѓувреме, европските лидери сè повеќе изразуваат загриженост поради односот на Трамп кон НАТО и неговите критики кон европските членки на Алијансата, кои, според Вашингтон, не ја поддржале доволно американската воена акција против Иран.