Претседателот на СДСМ, Венко Филипче, ја обвини Владата дека создава нереална слика за економската состојба во државата, оценувајќи дека животниот стандард на граѓаните е најдобриот показател за вистинската состојба.
На прес-конференција, Филипче изјави дека тврдењата оти Македонија е меѓу најуспешните европски економии не одговараат на реалноста.
„Празните фрижидери и празните паричници се најдобриот демант за приказните дека овде тече мед и млеко“, рече тој.
Според него, земјата се соочува со пад на странските инвестиции, намалување на индустриското производство, стагнација на просечната и минималната плата, како и на примањата во здравството, образованието и социјалната сфера.
Филипче предупреди дека претстојната есен може да донесе дополнителен ценовен притисок поради неизвесноста околу цената на електричната енергија и оцени дека предложениот ребаланс на Буџетот нема да придонесе за подобрување на животниот стандард.
Од ВМРО-ДПМНЕ возвратија дека прес-конференцијата на лидерот на СДСМ е доказ за, како што наведоа, „конфузијата и хаосот“ во опозициската партија.
Од владејачката партија го обвинија Филипче за контрадикторни ставови, посочувајќи дека истовремено се залага за побрза интеграција во Европската Унија, а го блокира носењето на новиот Изборен законик, кој, според нив, е дел од реформските обврски кон ЕУ.
ВМРО-ДПМНЕ оцени дека СДСМ нема визија и конкретен план, туку настапува од позиција на страв од нов изборен пораз.