Претседателот на Собранието Африм Гаши најави дека во септември ќе ги стави на дневен ред законите за кои е потребно Бадентерово мнозинство, иако нивното усвојување останува неизвесно поради политичките несогласувања и можноста опозициската ДУИ повторно да ги користи процедуралните механизми за блокирање.
Меѓу предлозите за кои е потребно вакво двојно мнозинство се законите поврзани со правичната застапеност, високото образование и локалната самоуправа, како и други системски решенија што директно ги засегаат заедниците.
„Сите закони, и оние за кои е потребен Бадентеровиот принцип, ќе ги ставиме на дневен ред на следните седници. Потоа, дали ќе има гласање или не, ќе одлучат пленумот и немнозинските пратеници“, рече Гаши на брифинг со новинарите.
Тој очекува во текот на септември сите закони кои досега пристигнале во Собранието да бидат разгледани.
Гаши: Прашањето станува политичко
Според претседателот на Собранието, спорот околу Бадентеровото мнозинство веќе има поголема политичка отколку процедурална димензија.
Гаши рече дека е во контакт со сите пратенички групи и дека се прават обиди преку дијалог да се дојде до решение.
„Ако прашањето навлегува во политичката сфера, тогаш на друго политичко ниво се разговара. Се согласувам дека ова прашање треба да се реши, но оставам на политичките актери да го решат“, рече тој.
На координативната средба во Собранието присуствувал и заменик-координаторот на пратеничката група на ДУИ, но, според Гаши, немало најава дека партијата повторно ќе ги блокира постапките.
Гаши досегашното однесување го оцени како „злоупотреба на Деловникот“, а не како класична блокада.
Тој побарал и од Комисијата за деловнички и мандатно-имунитетни прашања да ја протолкува одредбата што се однесува на процедуралните барања, со цел да се утврди дали тие можат да се користат за блокирање на работата на Собранието.
Бадентер станува тест за владејачкото мнозинство
Бадентеровиот принцип бара, покрај редовното парламентарно мнозинство, и мнозинство од пратениците кои припаѓаат на заедниците што не се мнозинство во земјата.
Кај одлуките за кои е потребно мнозинство од вкупниот број пратеници од немнозинските заедници, при сегашните 39 такви пратеници потребни се најмалку 20 гласа.
Тоа ја прави позицијата на ДУИ политички значајна за дел од законите, и покрај стабилното вкупно парламентарно мнозинство на Владата.
Токму законите за правична застапеност, образованието и другите прашања поврзани со заедниците може да бидат еден од првите поголеми парламентарни тестови по летната пауза.
Гаши е против предвремени избори
Гаши ја отфрли тезата дека процедуралниот застој сам по себе треба да доведе до предвремени парламентарни избори.
„Не треба една злоупотреба на Деловникот да предизвика предвремени избори, но тоа е политичка одлука и за тоа може да се решава и на друго ниво“, рече тој.
Според Уставот, за распуштање на Собранието е потребна одлука на мнозинството од вкупниот број пратеници, односно најмалку 61 глас.
Гаши рече дека лично се залага парламентарните избори да се одржат во редовниот термин.
Септемвриските седници, сепак, ќе покажат дали власта и опозицијата можат да постигнат договор за законите што бараат Бадентерово мнозинство или процедуралниот спор ќе прерасне во поширока политичка конфронтација.