Поранешниот претседател на Основниот суд Гостивар, Елјеса Алији, кој годинава беше осомничен за примање поткуп од 8.000 евра и во меѓувреме заминал во пензија, повторно поднел кандидатура за челната позиција во судот, соопшти Судскиот совет.
Кандидатурата не била прифатена затоа што Алији веќе ги исполнувал условите за старосна пензија.
За претседател на Основниот суд Гостивар е избран досегашниот вршител на должноста Мирослав Петровски, чија документација била оценета како уредна и комплетна.
Третата кандидатка, Драгослава Веселиновска, била исклучена од постапката поради нецелосна документација, односно затоа што не доставила акциски план за работа.
Алији беше осомничен за поткуп од 8.000 евра
Кандидатурата на Алији привлекува внимание бидејќи тој во мај годинава, додека беше претседател на Гостиварскиот суд, беше осомничен во истрага за примање поткуп во износ од 8.000 евра.
Станува збор за сомнение, а не за правосилно утврдена вина.
И покрај тоа, Алији повторно конкурирал за раководната позиција во истиот суд.
Судскиот совет неговата кандидатура не ја одбил поради истрагата, туку поради тоа што ги исполнувал условите за старосна пензија.
Избрани претседатели и во Дебар и Свети Николе
На истата седница Судскиот совет избрал претседатели и на основните судови во Дебар и Свети Николе.
За претседател на Основниот суд Дебар е избран Оруч Абазовски.
Со Основниот суд Свети Николе ќе раководи Валентина Буровска, која била единствен кандидат на огласот.
Советот ги разгледал и кандидатурите за претседател на Апелацискиот суд Скопје и Основниот суд Струга.
За челната позиција во скопска Апелација во следната фаза продолжуваат судиите Зоран Герасимовски и Лидија Зимбовска, откако нивните пријави биле оценети како навремени и комплетни.
За претседател на Основниот суд Струга единствен кандидат е Танче Петревски.