Обвинителот Фатон Азизи е кандидат за раководител на Основното јавно обвинителство за гонење организиран криминал и корупција (ОЈО ГОКК), една од клучните институции задолжени за предмети од областа на организираниот криминал и високата корупција во Северна Македонија.
Азизи влегува во трката за наследник на актуелниот шеф Ислам Абази, чиј мандат завршува.
Од „Адитив“ до „Ботокс“ и „ФФМ“
Азизи дипломирал на Правниот факултет во 2006 година, а правосудниот испит го положил во 2011 година. Во 2014 година ги завршил магистерските студии со труд посветен на соработката на Македонија со Европскиот суд за човекови права и примената на Европската конвенција за човекови права.
Од 2017 до 2019 година ја посетувал Академијата за судии и јавни обвинители, а во ноември 2019 година бил избран за јавен обвинител во Основното јавно обвинителство Скопје.
Во март 2024 година бил делегиран во ОЈО ГОКК, каде што работи на предмети поврзани со организиран криминал, финансиски криминал и корупција.
Азизи е ангажиран во одделот за висока корупција, а бил вклучен и во комуникацијата и соработката со Евроџаст.
Еден од позначајните предмети во кои е ангажиран Азизи е „Адитив“, во кој обвинението опфаќа 38 лица.
Тој бил ангажиран и во постапката поврзана со поранешната претседателка на Државната комисија за спречување на корупцијата, Татјана Димитровска, како и во предметите познати во јавноста како „Ботокс“ и „ФФМ“.
Во неговото професионално портфолио се и предмети вратени на повторно судење, меѓу кои постапката поврзана со поранешниот генерален секретар на Владата, Драги Рашковски, како и предметот „Меѓународен сојуз“.
Станува збор за предмети со висок јавен интерес, но самото учество на обвинител во нив не претставува мерка за успешност. За оценување на работата на кандидатите релевантни се и исходот на постапките, квалитетот и одржливоста на обвиненијата и нивната работа како обвинители.
Трка за една од најчувствителните позиции во обвинителството
Изборот на нов шеф на ОЈО ГОКК доаѓа во период кога борбата против високата корупција останува едно од најчувствителните прашања во правосудниот систем.
Новиот раководител ќе преземе обвинителство кое постапува по некои од најсложените случаи на организиран криминал, финансиски криминал и корупција во државата.
За Азизи, искуството во одделот за висока корупција, работата на комплексни предмети и меѓународната обвинителска соработка се дел од професионалното досие со кое влегува во трката.
Покрај Азизи, за раководната функција во ОЈО ГОКК се кандидираат уште четворица обвинители со различно професионално искуство. Искра Хаџи-Василева е обвинителка во ОЈО ГОКК и доаѓа од самата институција со која претендира да раководи, додека Лидија Раичевиќ е обвинителка во Основното јавно обвинителство Скопје и годинава беше кандидат и за државен јавен обвинител. Јован Цветановски е обвинител во Вишото јавно обвинителство Скопје, од каде доаѓа и Трајче Пеливанов, поранешен обвинител во Специјалното јавно обвинителство кој во кариерата работел и во ОЈО ГОКК. Со тоа, изборот за наследник на Ислам Абази обединува кандидати од специјализираното обвинителство, скопското основно обвинителство и повисокото ниво на обвинителскиот систем.
Конечната одлука, сепак, ќе зависи од изборната постапка и од поддршката што кандидатите ќе ја добијат од обвинителите.