Проценките на Министерство за внатрешни работи (МВР) и Агенција за национална безбедност (АНБ) дека не може да се гарантира безбедноста на поранешниот вицепремиер Артан Груби во притвор биле клучни за одлуката тој да биде префрлен во куќен притвор со 24-часовен полициски надзор, соопшти Обвинителството.
Одлуката беше донесена по повеќечасовен распит, откако Груби беше спроведен во Истражниот затвор „Скопје“, познат како „Шутка“. Тој претходно важеше за бегалец и по него во декември 2024 година беше распишана меѓународна потерница. Осомничен е за злоупотреби поврзани со предметот „Државна лотарија“, вредни околу осум милиони евра.
„Согласно Законот за кривична постапка, мерката куќен притвор, особено кога се реализира со 24-часовен надзор, е исто така притворска мерка“, соопшти Јавно обвинителство на Република Северна Македонија, додавајќи дека специфичните услови во случајот се однесуваат на безбедносни ризици.
Според обвинителството, МВР и АНБ доставиле информации дека во притворското одделение не може да се гарантира личната безбедност на осомничениот. Деталите за наводните закани биле презентирани пред судијата на претходна постапка.
Како дополнителни аргументи за поблага мерка беа наведени доброволното пријавување на Груби, неговата подготвеност за соработка и можни закани кон членови на неговото семејство. Обвинителството соопшти дека против него продолжува истрагата за кривичното дело „проневера во службата“, како и финансиска истрага во рамки на која се обезбедени поголем дел од доказите.
Од Основен кривичен суд Скопје соопштија дека судот ја донел одлуката откако обвинителството дало позитивно мислење за замена на мерката притвор со куќен притвор. Дополнително, на Груби му е одземена патната исправа и изречена забрана за издавање нов документ за патување.
Одлуката предизвика остри политички реакции. Социјалдемократски сојуз на Македонија оцени дека со ваквиот потег е „погребана правната држава“ и обвини за политички договор, додека ВМРО-ДПМНЕ соопшти дека процесот ќе продолжи и дека „правда ќе има“.
Случајот потсети на 2021 година, кога поранешниот шеф на тајната полиција Сашо Мијалков, по кратко бегство, исто така заврши во куќен притвор пред да биде спроведен во затвор.
Груби дополнително се наоѓа и на американската „црна листа“. Обвинителството инсистира дека мерките се предложени исклучиво врз основа на законските овластувања и дека целта е обезбедување непречено водење на истрагата.