НАТО одржува затворени средби со сценаристи, режисери и продуценти од филмската и телевизиската индустрија во Европа и САД, што предизвика критики дека Алијансата се обидува преку уметноста да ја засили својата јавна порака, објави „Гардијан“.
Според весникот, досега биле одржани средби во Лос Анџелес, Брисел и Париз, а следната е планирана во Лондон во јуни, со членови на британското здружение на сценаристи. Разговорите се опишани како „интимни средби“ за безбедносната ситуација во Европа и пошироко.
Дел од поканетите автори реагирале дека ваквиот формат создава впечаток оти од нив се очекува да придонесат кон „пропаганда за НАТО“. Ирскиот сценарист Алан О’Горман ја оцени иницијативата како „скандалозна“ и „очигледна пропаганда“.
Во поканата до сценаристите, според „Гардијан“, било наведено дека претходните средби веќе инспирирале три проекти во развој. НАТО, пак, тврди дека иницијативата произлегла од интерес на луѓе од индустријата подобро да разберат како функционира Алијансата.
Од здружението на сценаристи во Велика Британија велат дека поканата не значи поддршка за НАТО, туку можност за двонасочен разговор, при што авторите можат слободно да поставуваат прашања и сами да одлучат што, ако нешто, ќе искористат.
Критичарите предупредуваат дека вакви средби можат да влијаат врз начинот на кој безбедносните теми, војните и геополитиката се претставуваат во филмовите и сериите, особено во период кога Европа ја зголемува одбранбената потрошувачка по руската инвазија врз Украина.