Високата претставничка на Европската Унија за надворешна политика, Каја Калас, изјави дека поранешниот германски канцелар Герхард Шредер не е соодветен избор за европски преговарач во евентуалните мировни разговори меѓу Русија и Украина.
Изјавата следува откако рускиот претседател Владимир Путин предложи Шредер да ја претставува Европа во разговорите за завршување на војната.
„Прво, ако ѝ дозволиме на Русија да назначува преговарач во наше име, тоа не би било многу мудро“, изјави Калас пред состанокот на министрите за надворешни работи во Брисел.
Таа потсети дека Шредер бил висок функционер и лобист во руски државни енергетски компании.
„Јасно е зошто Путин го сака токму него – така би седел на двете страни на масата“, додаде Калас.
Шредер, кој беше германски канцелар од 1998 до 2005 година, со години е критикуван во Европа поради блиските врски со Кремљ и руските енергетски компании.
Досега главен посредник во разговорите меѓу Москва и Киев беа САД, додека Европа имаше ограничена улога.
Во меѓувреме, германскиот министер за надворешни работи Јохан Вадефул изјави дека Европа треба поактивно да учествува во преговорите преку т.н. Е3 група – Германија, Франција и Велика Британија.
На прашањето под кои услови ЕУ би прифатила директни разговори со Путин, Калас порача дека Москва мора да покаже конкретни отстапки.
Како пример го наведе повлекувањето на руските трупи од Молдавија.
„Прашањето за европската безбедност е што Русија постојано ги напаѓа своите соседи. Потребни се отстапки и од руската страна“, рече Калас.
Таа додаде дека повлекувањето на руските сили од Молдавија би можело да биде еден од условите за поголемо европско вклучување во мировниот процес.