Претседателот на СДСМ, Венко Филипче, објави документ за кој рече дека потекнува од компанија заинтересирана за изградба на дата-центар во Северна Македонија и во кој, според него, се наведува дека за проектот е обезбеден капацитет од 100 мегавати електрична енергија и директен пристап до реката Вардар.
Филипче на прес-конференција ја обвини Владата дека проектите за дата-центри ги подготвува нетранспарентно и повика новинарите да ги проверат наводите од документот, кој, како што рече, бил објавен пред три месеци.
„Ќе споделам со јавноста еден документ од една компанија, објавен пред три месеци, во којшто компанијата јасно и гласно наведува дека станува збор за дата-центар којшто треба да го развиваат кај нас, дека е обезбеден капацитет на струја од 100 мегавати, дека имаат директен пристап до реката Вардар“, рече Филипче.
Според него, во документот се наведува и дека постојат потврди од Владата дека проектот може да продолжи.
Филипче не презентираше независна потврда дека компанијата навистина ги обезбедила наведените енергетски и водни капацитети. Од изнесените информации, исто така, не е јасно под кои услови би се користела водата од Вардар и дали станува збор за веќе одобрен проект или за план на инвеститорот.
Прашања за потрошувачката на вода и струја
Лидерот на СДСМ рече дека евентуалната изградба на големи дата-центри отвора прашања од јавен интерес поради нивните потреби од електрична енергија и системи за ладење.
Тој побара од Владата да објасни дали користењето вода за дата-центрите може да влијае врз земјоделството и другите корисници.
„Кој гарантира дека земјоделците нема да останат без вода заради дата-центрите?“, праша Филипче.
Тој рече дека треба да се утврди колкави количества вода би користеле планираните центри, од каде би се обезбедувала водата и како би се третирала по употребата.
Филипче го отвори и прашањето за влијанието на дата-центрите врз електроенергетскиот систем.
„Што ќе се случи со цената на струјата? Дали тоа големо искористување ќе ја поскапи? Дали тоа значи дека ќе има дополнителен увоз?“, рече тој.
Според него, треба да се процени и дали резервирањето големи енергетски капацитети за дата-центри би можело да го ограничи приклучувањето на други индустриски инвестиции во истите области.
Филипче побара да се испита и потенцијалното влијание врз животната средина, вклучително и начинот на кој би се користела и испуштала водата потребна за ладење.