Протестите против владата на албанскиот премиер Еди Рама влегоа во 13-ти ден во петокот, при што дојде до тензии и физички судири меѓу демонстранти и поддржувачи на владејачката Социјалистичка партија пред зградата на Владата во центарот на Тирана.
Инцидентите се случија по завршувањето на одбележувањето на 35-годишнината од основањето на Социјалистичката партија на плоштадот „Италија“, кога дел од присутните се упатија кон протестот што се одржуваше пред премиерската зграда.
Според снимките објавени од албанските медиуми, дошло до вербални расправии и турканици меѓу двете групи, по што интервенирала полицијата за да спречи понатамошна ескалација.
Организаторите на протестите ги повикаа учесниците да не наседнуваат на провокации и да го задржат мирниот карактер на собирот.
„Опозицијата се обиде да го преземе протестот, но нема да ја уништи оваа народна енергија“, изјави активистот Албен Кола преку мегафон пред насобраните.
Други говорници упатија повик до вработените во јавната администрација да им се приклучат на демонстрантите, оценувајќи дека протестите се насочени кон политички промени во земјата.
Во меѓувреме, премиерот Еди Рама, говорејќи на партискиот собир, ги критикуваше организаторите на протестите и ги отфрли обвинувањата упатени кон владата. Тој оцени дека протестите не претставуваат „мерење на сила“, туку дел од демократскиот процес.
Протестите започнаа пред речиси две недели и се фокусирани на барања за политички реформи, промени во изборниот систем и поголема одговорност на институциите. Дел од демонстрантите бараат оставки и предвремени избори, додека организаторите најавуваат дека протестните активности ќе продолжат и во наредните денови.
Засега нема информации за потешко повредени или приведени лица во инцидентите пред Владата.